Sääʹm-museo Siida lij väʹlddčuâǥǥas neellj (E75) kuâŋŋsest Aanar ceerkavsiidâst, Juutuajooǥǥ moost tââvpeäʹlnn.
Sääʹm-museo Siida lij alggmeer museo da säʹmmla lie Euroopp unioon vuuʹd oʹdinakai alggmeer. Sääʹm-museo lij Tâʹvvjânnmi vuõssmõs sääʹm-museo da tõn vuâđđee säʹmmla jiijj. Eeʹjj 1959 Samii Litto – Säʹmmlai õhttõs tåimmjååʹđteei Johan Nuorgaam jååʹđteʹmen vuâđđii Aanar Sääʹm-museo, kååʹtt toiʹmmji eeʹjj 1998 räjja ålggmuseon ǩieʹsspõõʹji.
Eeʹjj 1986 vuâđđeeš Sääʹm-museofoond, koon täävtõssân leäi tuejjeed ämmatliʹžžen da raʹvvjed sääʹm-museotoiʹmmjummuž. Sääʹm-museofoond täävtõssân lij säʹmmlai meersaž kulttuur tuärjjeem da oouʹdeem. Foond ohjjeem museotoiʹmmjummuž mieʹrren lij tuõʹllʼjed da raʹvvjed sääʹmnarood teâttmõõžž jiijjâs kulttuurâst, historiast da pirrõõzzâst di tuärjjeed sääʹm identiteeʹtt da kulttuurlaž jiõččtååbd. Sääʹmkulttuur ruõkkmõõžžâst Lääʹddjânnmest vaʹsttii eeʹjj 1998 räjja Lääʹddjânnam meersažmuseo, koon mâŋŋa ruõkkâmvasttõs serddji Sääʹm-museo Siidaaʹje.